Áríðandi orðsending til listamanna sem áttu ferilsskrár inni á vef Upplýsingamiðstöðvar myndlistar, umm.is:
Nú styttist í að SÍM og Myndstef opni með formlegum hætti nýjan upplýsingavef um myndlist og myndhöfunda á Íslandi sem unninn er upp úr gagnagrunni Upplýsingamiðstöðvar myndlistar. Vefurinn verður framvegis í umsjá SÍM .
Þó nýi vefurinn sé á margan hátt einfaldari í uppbyggingu hefur hann mun fleiri innri tengingar en sá gamli og nýtist betur til upplýsingaleitar. T.d. er hægt að leita eftir efnisorðum að listamönnum sem vinna með ákveðna tækni eða efni. Ef valinn er skóli á upplýsingasíðunum fyrir listamenn birtist listi yfir listamenn sem hafa verið þar í námi, svo fremi að upplýsingar um nám í viðkomandi skóla séu inni á ferilssíðum viðkomandi listamanna á vefnum. Þegar er hægt að forskoða nýja vefinn á slóðinni www.umm.is og hvet ég þig til að skoða þig um. Þar sem vefurinn er enn í vinnslu geta ýmis vandamál komið upp. Sýndu þolinmæði, þetta kemur allt smám saman.
Þar sem nokkuð er um liðið frá því að Upplýsingamiðstöð myndlistar var lögð niður eru ferilskrárnar margar hverjar ófullkomnar. Til þess að vefurinn verði sem bestur þegar hann verður opnaður er æskilegt að síðurnar verði yfirfarnar á næstu dögum. Vinsamlegast líttu yfir þína eigin skrá og kannaðu ástandið. Viðbúið er að þar vanti margt. Í einhverjum tilvikum hafa upplýsingar brenglast við yfirfærsluna á milli kerfanna tveggja. Einnig geta persónulegar upplýsingar hafa breyst, s.s. heimilisföng, símanúmer eða netföng. Íhugaðu leitarorðin vel (efnisorð, vinnusvið og verkefni). Þau eru mikilvæg en þau eru hugsuð til að þrengja leit að ákveðnum hópi listamanna. Ólíkt gamla vefnum þar sem eingöngu mátti birta 6 myndir er ekkert þak á fjölda mynda inni á nýja vefnum. Athugaðu að ekki tókst að tengja allar myndir úr gamla gagnagrunninum rétt og getur það tekið nokkurn tíma þar sem það útheimtir mikla handavinnu.
Viðhald vefsins byggist að stórum hluta á listamönnunum sjálfum en hver og einn fær aðgang að sinni eigin síðu með lykilorði. Vefurinn er afskaplega notendavænn og eru allir hvattir til að fara inn á sína eigin síðu og ganga úr skugga um hve auðvelt það er að halda henni við áður en nokkur ákveður að það sé ofvaxið sinni tölvufærni. Innskráningarglugginn er hægra megin á síðunni. Notendanafn er ávallt kennitala (með bandstriki) og til að byrja með er kennitalan jafnframt lykilorð. Þegar þú ert kominn inn hverfur innskráningarglugginn en í staðinn stendur: Velkomin(n) og: Smelltu hér til að skrá þig út. Þá hefur einn liður bæst við á láréttu línuna ofan við gula bekkinn, Mín síða. Þú velur hana og þar getur þú valið á milli þeirra þátta sem þú telur þörf á að uppfæra. Þegar þú hefur sett nýjar upplýsingar inn velur þú aðgerðina að uppfæra og heldur svo áfram. Þegar uppfærslu er lokið skráir þú þig út af vefnum.
Bréf þetta er áskorun til allra sem vilja nýta sér þennan nýja vef að hjálpa til við að gera hann sem réttastan og nothæfastan áður en hann verður opnaður með formlegum hætti. Vefurinn hefur verið lengi í vinnslu, mun lengur en upphaflega stóð til og því liggur á að koma honum í gagnið. Við hyggjumst opna hann formlega innan örfárra daga.
Gangi þér vel við uppfærsluna!
Bestu kveðjur, Áslaug Thorlacius, formaður SÍM